Zwoa, ‘k dienk’n da’ de hemjinte noe wè z’n zin za’d èn. Toch zeek’r Tini Maon’out za’ in d’r nopj’s zien. ‘k En ’t vansèf oav’r die rwoaje pingwiengs eeh, die a noe an de jacht’aov’n staon. Zeg noe asj’blieft nie’ da’ je ze nog nie’ hezien èt, wan’ ze staon zwoa ‘oaghe da’ je ze mie ‘èld’r weer vanaf ’t Belfort in Sluus zie staon. M’sschiens oek nog wè bie mist, mao’ da’dèt nog nie’ hedaon.
’t E ’n paor jaortj’s heduurd en vee’ informaosie kreegh’n wudd’r tuss’ndeu’ nie’ te ‘oar’n oav’r da’ kunstwèrr’k. Je vroeg je neigh’n af of ’t noe wè of nie’ deu’hieng. Zouw de hemjinte soms bange hewist zien voa’ aksiehroep’n? Zwoa wein’g wier t’r oav’r hezeid, mao’ oav’r aksiehroep’n oef je op Bresj’s nie’ bange te zien, die zie’k ‘ier nog nie’ jin, twi, drie hebeur’n. Kiek mao’ toen a in de jaor’n zev’nt’g dien diek d’r kwam. Ied’rjin was t’r op teegh’n, mao’aljinn’g op ’n v’rjaordag of in ’t café. Toen a tie d’r jinmaol was, wier t’r op heverfd ‘weg mie d’n diek’, mao’ da’ was vansèf vee’ te laote eeh.
Toch dienk ‘k da’ die pingwiengs een misstap is. Weete hie waorom? ’t Zit naom’l’k zwoa. De recreaotiebedriev’n in West-Zjiws-Vlaond’r’n maok’n reclaome deu’ te zegh’n da’ tier zwoa lekk’r rust’g is. Nou, dao’ haon ze noe wè acht’r komm’n en de hemjinte oek. D’r is bereek’nd da’ da’ kunstwerr’k jil vee’ kiek’rs hao’ trekk’n. D’r haon vele duuz’nd’n mens’n op af komm’n. Zwoa hao ’n nieuw fenoameen in ons landje onstaon: files! Da’dis ‘ier nog nwoait hebeurd. ’t Is hedaon mie de rust van de Bressiaond’rs. ’t V’rkjir hao’ jille daogh’n vastlwoap’n. Mie onze twibaonsweegh’n zien we dao’ jillemao nie’ op bereek’nd, dus ’t wor hewoan ’n puun’oap. Held om ’t weegh’nnet an te pass’n is t’r nie’. De Bressiaond’rs die ied’re dag eev’n de kaoje moet’n zien kunn’n d’r nauw’l’ks mji’ terecht en voa’ die njinn’n die a ’t wè lukt, die hao z’n eigh’n ’n vrèmd’n in z’n eigh’n durr’p vinn’n tussen al die duuz’nd’n bezoek’rs. ’t Hevolg is da’ al die toerist’n in de toekomst nie’ mji’ nao’ West-Zjiws-Vlaond’r’n komm’n, omda’ z’ier nie’ tot rust kunn’n komm’n.
Nji Sakke, ‘k bin d’r ‘aost zeek’r van dan wudd’r d’r nie’ op vooruut haon. Leve de demoacraosie!

De nèst’gheid eeh,

Arjaon