Noe sloeg ‘k voar’ghe weeke de krante oap’n en toen zag ‘k anjins ’n hrwoate kop waorin stoeng dat Bresj’s van Woasburg ao hewonn’n. Da’ von’k aord’g, wan’k wis’ nie’ beet’r dan da’t winterstop was. ‘k An wè’ h’oar’n da’ t’r ’n nieuwe treen’r voa’ ’t jiste elftal was. Zou da’ m’sschiens ’n schokeffect zien? Noe is ’t a jil lank heleej’n da’k ’n kji’ nao’t voetbalveld hewist zien, mao’ zwoa af en toe woar ‘k op de kaoje wè ‘oe a ’t haot en zwoanie’ dan lees ‘k ’t wè’ in de krante.
Nieuwsgier’g heworr’n behon ‘k da’ stikje in de krante te leez’n, wan ‘k will’nde wè’ ’n kji’ weet’n mie’ ‘oevee’ Bresj’s hewonn’n a. D’n inleidieng von’k a vreemd, want daorin liet’n ze Suzan Boersmao an ’t woard. Wa’ è tie noe mie voetbal te maok’n as voa’zitt’r van de Durr’psraod?, vroeg ‘k m’n eigh’n hliek af. Zou tie noe oek a in ’t bestuur van Bresj’s zitt’n? M’sschiens is zie wè’ de nieuwe treen’r of heef ze als durr’psomroepst’r in de rust wè’ de tuss’nstann’n van d’and’re wedstrij’en deu’? Weet ‘k vee’.
Boav’n da’ artik’ltje stoeng oek nog ’n staotje mie’ sief’rs. Ik an nog alkmao’ niks deu’ en docht a da de comp’titiestand was. Bresj’s stoeng vierd’s, ze waor’n mie’ die nieuwe treen’r dus a flienk hesteegh’n en an zell’fs 24 punt’n mjir dan Woasburg. Toen a’k zag da’ Sinte Kruus jist stoeng, Biervliet twidd’s en Sluus derd’s behon ‘k ’t wa’ vreemd te vinn’n, wan’ in Sinte Kruus ei je toch jillemao’ hjin voetbalclub?
Toch nog mao’ ’n kji’ wa’ beet’r da’ stikje leez’n en toen an ‘k ’t deu’. Da’ gieng jillemao’ nie’ oav’r voetbal, maor oav’r ’t aontal inweun’rs van West-Zjiws-Vlaond’r’n. Bresj’s a de mjiste, 24 mjir dan Woasburg. Eind’l’k, docht ik mie m’n eigh’n, behinn’n mens’n buut’n Bresjes oek ’n kji’ deu’ te kriegh’n da’ je beet’r op Bresj’s kan weun’n dan in Woasburg. Zell’fs de mens’n van De Burght will’n nie’ mji;’ t’rug nao’ Woasburg en haon strèk in ’n nieuwe Burght weun’n die op de plekke van Hoed’rtiet hebouwd hao’ worr’n. Oek voa’ deeze mens’n hel’ dus da’ je nwoait ’t oud heworr’n ziet om te ljirr’n.
Hup Bresj’s!

De nèst’gheid eeh,

Arjaon