Zeg wete hie soms of dâ nieuw opgerichte kommitéé tot behoud van de vuurtoren noe serieus is of dâ’t om een grap gaot. Ik weet nie of je ’t al opgevall’n is, maor sinds dâ in Op Bresjes è gestaon, bin d’r nog nôôit zovéé vuurtorens weggesoudemietert as de leste weken. Je kun bie gêên wienkel in Bresjes komm’n of de stoepe ligt bezaojd mee afbeeldieng’n van de vuurtoren. En volgensmie gaot dâ weggôôi’n ook nog es gepaord mee de nôôdige agressie.
De mêêste bin behoorlijk bekrast. ’t Schien zèlfs zôô erg te zien, dâ â je z’ôôn plaotje nie op straote of in een prullemande klakt maor netjes inlevert, je kanse maokt op een elektriese fiets of op z’n minst vuufentwintig euro kriegt. Het moet’n dâ wel vuurtorens zin, in de authentieke rôôd-witte kleur’n van de jaor’n vûûftig, dus rôôd-wit.
Natuurlijk wéé slim bekeken van die winkeliers om de eindejaorsactie an onze vuurtoren te koppel’n. En dan maor klaog’n dan me mee de crisis d’r slecht voo staon. A je bekiekt da je een tientje moe besteej’n om an een setje vuurtorens te komm’n en kiekt wâ je op straote al van die kaortjes tegenkomt, dienk ik dâ die elektriese fiets z’n eih’n goed t’rug betaolt. En dan dienk ik bie m’n eih’n: “Ao t’ er noe es gêên twidde fiets afgekund”.
Stel je’s voo! Je wint die fiets, mao je bin gelukkig nog mee z’n twêêj’n. Dan kan ’t er toch môôi â je een èndje wil gaon fiets’n d’r êêne z’n eih’n kapot trapp’n. Gevolg is dâ ’t er een behoorlijke wissel wor’ getrokk’n op wâ tot voo kort nog op een gelukkig huwelijk leek. En is het een daomes- of een herenfiets? Ik persôônlijk zou gaon voor een daomesfiets. A je dan op zondagmiddag as vint nao de voetbal wil en je vrouwe zegt dâ ze dan weer een hêêle zondagmiddag allêênig zit, kun je zegg’n: “Dan gao je toch es lekker en ènde gaon fiets’n.”
Ik hôôr’n het Jaone â zegg’n: “Jao da’s goed, dan riej’ik es tot in Slûûs om te gaon wienkel’n.” Daor è je tenminste kans op een Toyota.

Zeg wudder blûûv’n mee de kerstdaog’n gewoon thûûs eten wor’. Me will’n es wâ kalmpjes an doen, wan’ een all-risk verzekerieng voor een elektrieke fiets en een auto gauw ook nie in je kouwe klêêr’n zitt’n.

Alléé de hroet’n weer éé, fijne kerstdaog’n en avast de beste wèns’n vôô ’t nieuwe jaor.

Sakke