Ook a druk bezig gewist mee ûût te vissen op welke partij je strekjes op drie mèrte gao stemm’n. Wil je wê gelôôv’n dâ ‘k et deze kêêr wel knap moeilijk vin’. Het is zèlfs zôô sterk dâ ‘k â mee de gedachte rond helôôp’n èn om mao nie te gaon stemm’n en mie kènnende zul je toegeev’n dat dan wel hêêl erg is.
Mao om dan niete gaon stemm’n ook gêên oplossing is bin ik dan nog maor es alle partijprogrammao’s ingedook’n. Wâ bie iederêên opvalt is dâ ze beloov’n om de gemêênte Slûûs wéé financieel gezond te maok’n. Dus dao zitt’n weinig verschillen en dus keuzemogelijkheden in. Overigens van zôô’n belofte zakt toch hêêlemaol je broek af voo zôôverre je die op onze leeftied van z’n eig’n â nie mêêr fasoen’lijk op kan ouw’n. Eerst èn ze d’r zelf voo gezurgd dâ me in de financiële prut zitt’n en dan inêêns zou’wn ze weten oe dan me d’r weer ûût moet’n komm’n. Dâ’s noe es een staoltje van voo je n’eig’n politieke wèrkgelegenheid zurg’n (kort deu de bochte: ”eig’n belang”).
Dus èn ik maor es m’n heil gezocht bie de kieswijzer van de PZC. Je zou toch moet’n dienk’n dat dâ dan wâ perspectief biej’t. Mao niks van dat alles éé. Ik èn naomeliojk êêrst is ûûtgeprobeerd of die kieswijzer wel echt werkt. Nou nie dus. Wâ èn ik naom’lijk gedaon?
Noe kèn ik de mêêste kandidaot’n toch redelijkgoed as persôôn en oe as ze in ‘t daogelijks leven over dieng’n praot’n, dienk’n en wèrk’n. Dus èn ik die lieste verschillende kêêr’n ingevuld en èlke kêêr as of ik êên van die kandidaot’n zelf was. Moe je toch ook nog es doen wan’ dan kun je echt lach’n of beter misschien, blêêt’n. Wan nie êên kêêr gaf die kieswijzer de eih’n partij an waorop je zou moet’n stemm’n. Dus dâ kan nog leutig worr’n.
Dus wâ ‘k noe mao gao doen is Jaone eur tactiek volg’n. Wee mêêr nao kantines van diverse verêênigieng’n en nao ‘t café gaon, wân’dao worr’n noe de nôôdige pint’n weggegeev’n. Verkieziengs-biênkomst’n, strandlôôp’n en weet ik al wâ nie voor evenemênt’n waor ze mee een oliebollekraom of iets van dien aord staon en van alles graotis weggeev’n.
Dan èn me d’r teminste nog êênig voordêêl an is Jaone’s redenaotie. Zèlf zit ‘k te dienk’n om m’n stemmachtiging an d’n hôôgste bie’jer te verkôôp’n. Dâ kon ook nog wel es een aordig zakcèntje oplever’n. En misschien mag dâ officieel dan wê nie, mao mocht ‘k er dan toch nog probleem’n mee krieg’n, kan ik nog altied zegg’n dâ’k het gèld an een goej’ doel ê gegeev’n. Bievoorbeeld an een nog op te richt’n fonds om voo mogelijk tussentieds vertrekkende wet’ouwers udder wachtgêld veilg te stell’n.
Mochte hie soms nog een beter idee èn, dâ hôôr ik dâ gauw genoeg van je, wan’ ik dienk dan ik judder ook wel wee mêêr in de voetbalkantine gao zien.

Allêê, de hroet’n weer éé.

Sakke