Noe is ’t nogâ fraoj’zeker éé. Ik bin ûûtéindlik toch maor es op ’t idéé gekomm’n om nie elke n’aovund mêêr voo dien tillevisie te gaon zitt’n en weer es mêêr een boek te gaon lezen. En omdâ we jaor’n geleej’n, vanwege dan me een tillevisie aon angeschaft, de leesportefeuille èn opgezeid en al m’n ouwe boek’n al lang op de rommelmart van d’âând è gedaon, docht ik: ”Dan aol ik ze wel in de biebeletheek.”
En wâ dienk je? Lees ik in de PZC dâ ze de biebeletheek ier in Bresjes will’n opdoek’n. Van de hemjinte will’n ze nie mêêr subsidie geven om zôôdoende de begrôôting rond te krieg’n. Maor over die in Oôstburg slûût’n dao hôôr je ze weer nie over. En volgens mie zou’t dâ toch veel logischer zin.
Kiek, ik kan me nie vôôstell’n dâ ’t er in Oôstburg mêêr gelezen wordt as in Bresjes, allêên maor vanwege ’t feit dat er iere mêêr mèns’n weun’n as in Oôstburg. Teminste, dâ èn ik toch pas in de PZC gelezen. Mao bliekbaor èt college dâ net weer nie gelezen. En misschien èn ze ’t wel gelezen, mao nie begreep’n. Zôôiets noem’n ze op de laogere schole “begrûûpend lezen”. Op udder rapport krieg’n de kinders tegenwoordig voor lezen dan ook twêê ciefers. Eêne voo technisch en êêne voo begrûûpend lezen. Bovendien telt dâ leste bie de Cito-toets ook nog es zwaor mee om te bepaol’n in welke brugklasse je kom te zitt’n op ’t Zwincollege.
Kiek, dan ze op de hemjinte nie goed kunn’n rekenen, dâ wist’n me al lange, mao dâ ze udder eih’n nieuws in de PZC ook nog nie kunn’n lezen, dao zak je broek hêêlemaol van af. En al die gast’n die an in de hemjinteraod zitt’n, bin â nie véé beter. Die lezen ook te weinig. Die zou’n misschien ook veel vergaodertied bespaor’n, an ze allêên maor de raodstukk’n es mêêr en goed zouw’n lezen. Dan zou’t wellicht nie zôô dikwijls voo’komm’n dâ ze èrgens van ’t jaor vôô stemm’n, waor ze een jaor geleej’n nog aon afgesproken dâ ze d’r tegn zouw’n stemm’n.
Arjaon, ik gaon d’r mee stopp’n, wan’ ik zou d’r een boek over kunn’n schriev’n. Mao ‘k gaon ‘t nie doen. Z’ôôn boek zou vee te dikke worr’n en daodeu’ véé te diere om zelf an te schaff’n. En dan blûûft ’t er maor êên mogelijkheid mêêr over: een biebeletheek.

Allêê, de hroet’n weer éé.

Sakke